《我的故事6》

琴日講到第一日就非常充實愉快咁完左。

第二日就清晨5點起身梳洗準備出門。炎炎夏日，天未光就醒，真係好舒服好涼爽。

兩個 apartment 有個大平台（terrazza）相連，Guido 有佢既天地，woofers/workaway 亦有我地既空間。

踏入平台，天仲係深藍色，遠處有一線橙紅，好似一個裂口，太陽好似就快從裂縫爆出。係清涼既平台伸個懶腰，就入屋食早餐，然後出發。

落到樓下，打開車房，挑選我既座騎 – 單車。一出門，已經要上斜路，喘哂氣先到教堂轉第一個彎，但進入直路之後，一路穿過矮矮平房，同田野果園，而天空亦慢慢變天藍（azzurro），感覺寫意。好快到直路盡頭，左一拐，右一轉，又再上斜。果園位於 Trepunti – Giarre 既高點，沿途斜路彎彎曲曲，盡是果園。

我出盡九牛二虎之力不停踩，但好似見唔到盡頭。呢個時候我已經滿頭大汗，太陽亦高高掛，我頓時明白點解要天未光就出發！踩到一間等待復修既破舊大屋，知道己完成一半路程，亦減速回回氣。破舊大屋周圍雜草叢生，果園亦己荒廢，但那種濃濃莊園既氣息仍然吸引，吸引到我有錢都想買。😅😅小休過後就繼續頂硬上，踩呀踩，終於到頂啦！踩多兩條街，再落斜就到達一座橙色大閘。我一生人都未試過開閘開到咁有滿足感！😌😌😌 （我身水身汁踩左半個鐘架！）😆😆😆

熱完身，穿上恤衫，戴上草帽，就開始工作。係呢段時間，果園工作主要摘黑莓、為番茄除雜草，用透光紙袋將桃一隻隻包好防蟲。聽落輕鬆簡單，但係做起黎一啲都唔易。

充滿荊棘既黑莓叢，除左有刺之外，要從中摘滿一盒真係好花時間；摘左成朝，日上三竿，都只係摘到2-3kg。

眼見番茄一排排生長於竹棚間，要踎低逐棵除草，腰力少啲都難以應付。加上要將番茄固定於竹棚，確保分株之間空氣流通，真係少啲心機耐性都唔得。

而桃既防蟲方法就真係未有所聞。除左將一枝樹枝上過多既桃除掉，仲用透光紙袋一隻隻將桃包好防蟲。要包得實，又唔可以損毀隻桃，好真係要技巧。仲要爬梯，高舉雙手先可以包到大部份既桃，拗腰、趷高腳就在所難免，。

以上項項工作都唔係粗重工夫， 唔使擔唔使抬，但係半日下來就全身散哂😪😪

粒粒皆辛苦真係唔係得個講，真係我逐粒黑莓摘、逐隻桃包，逐棵番茄照顧。好彩lunch 又 ready 啦！😌忽然之間明白一個家庭「有人主外，有人主內」好重要呀！☺️

#粒粒皆辛苦唔係得個講
#我嘅故事
#西西里有機火山檸檬
#西西里小農直送
#trepunti
#sicilianlemon